«Չելսին» «Արսենալի» նկատմամբ ռեւանշի հասավ ֆուտբոլի Անգլիայի առաջնության առաջին շրջանում կրած 0:3 հաշվով պարտության համար: Պրեմյեր լիգայի 24-րդ տուրի կենտրոնական խաղը տեղի ունեցավ «Չելսիի» խաղադաշտում եւ ավարտվեց Անտոնիո Կոնտեի թիմի հաղթանակով՝ 3:1 հաշվով:
Խաղի սկզբնամասն անցում էր հավասար պայքարում: 13-րդ րոպեին «Չելսին» բացեց հաշիվը, սակայն գոլը ստացվեց սկանդալային: Տանտերերի իսպանացի պաշտպան Մարկոս Ալոնսոն գոլի դրվագում օդային պայքարի ժամանակ արմունկով հարվածեց իր հայրենակից Հեկտոր Բելերինի գլխին, բայց մրցավարը կանոնների խախտում չտեսավ այդ դրվագում: Հարվածն այնքան ուժեղ էր, որ Բելերինը չկարողացավ շարունակել խաղը: Առաջին խաղակեսում «Արսենալն» ունեցավ հաշիվը հավասարեցնելու հնարավորություն, թեեւ թիմերն ընդմիջման գնացին 1:0 հաշվի ժամանակ:
Երկրորդ խաղակեսի սկզբնամասում բելգիացի կիսապաշտպան Էդեն Ազարը, աչքի ընկնելով անհատական բարձր վարպետությամբ, կրկնապատկեց հաշիվը: Ազարը գնդակը ստացավ կենտրոնում եւ միայնակ «ճեղքեց» հյուրերի պաշտպանությունն ու հաշիվը դարձրեց 2:0: Այդ գոլից հետո «Չելսին» սկսեց խաղալ երկրորդ համարով, իսկ «Արսենալը» ստացավ տարածքային առավելություն, ինչը գոլի վերածել չէր հաջողվում: 85-րդ րոպեին գնդակը նաեւ երրորդ անգամ հայտնվեց հյուրերի դարպասում: Փոխարինման դուրս եկած Սեսկ Ֆաբրեգասն օգտվեց Պետր Չեխի սխալից եւ գրավեց իր նախկին թիմի դարպասը, բայց գոլը չտոնեց: Ավելացված ժամանակում «Արսենալից» հաշիվը կրճատեց փոխարինման դուրս եկած ֆրանսիացի հարձակվող Օլիվյե Ժիրուն:
«Չելսին» 59 միավորով առաջատարն է եւ 12 միավոր գերազանցում է «Արսենալին», որը մեկ խաղ պակաս անցկացրած «Տոտենհեմի» հետ բաժանում է 2-3-րդ տեղերը:
Անգլիայի առաջնություն, 24-րդ տուր
«Չելսի» - «Արսենալ»՝ 3:1
Մարկոս Ալոնսո, 13, Էդեն Ազար, 53, Սեսկ Ֆաբրեգաս, 85 - Օլիվյե Ժիրու, 90+1
«Չելսի». Տիբո Կուրտուա, Սեզար Ասպիլիկուետա, Դավիդ Լուիս, Գերի Կեհիլ, Վիկտոր Մոզես (Կուրտ Զումա, 88), Մարկոս Ալոնսո, Ն՛Գոլո Կանտե, Նեմանյա Մատիչ, Էդեն Ազար (Սեսկ Ֆաբրեգաս, 84), Պեդրո (Վիլիան, 84), Դիեգո Կոստա:
«Արսենալ». Պետր Չեխ, Հեկտոր Բելերին (Գաբրիել, 13), Շկոդրան Մուստաֆի, Լորան Կոսելնի, Նաչո Մոնրեալ, Ֆրանսիս Կոկլեն (Օլիվյե Ժիրու, 65), Ալեքս-Օքսլեյդ Չեմբերլեն, Մեսութ Օզիլ, Ալեքս Իվոբի, Թեո Ուոլքոտ (Դենի Ուելբեկ, 70), Ալեքսիս Սանչես:
Комментариев нет:
Отправить комментарий